भारतीय संगीतविश्वातील दिग्गज गायिका आशा भोसले यांचं 12 एप्रिल 2026 रोजी मुंबईतील ब्रीच कँडी रुग्णालयात निधन झालं. त्या 92 वर्षांच्या होत्या. अत्यंत थकवा आणि मल्टिपल ऑर्गन फेल्युअरमुळे त्यांची प्राणज्योत मालवली. 11 एप्रिल रोजी त्यांना प्रकृती खालावल्यामुळे रुग्णालयात दाखल करण्यात आलं होतं.
जगभरात आपल्या सुरांनी मोहिनी घालणाऱ्या आशा भोसले यांची ओळख एक महान गायिका म्हणून आहे. मात्र, त्यांच्या आयुष्यातील एक वेगळा आणि विशेष पैलू म्हणजे त्यांचा अभिनय. 2013 साली प्रदर्शित झालेल्या ‘माई’ या चित्रपटातून त्यांनी वयाच्या 80 व्या वर्षी अभिनयात पदार्पण केलं होतं.
महेश कोडियाल दिग्दर्शित या चित्रपटात आशा भोसले यांनी ‘माई’ ही मध्यवर्ती भूमिका साकारली होती. चार मुलांची आई असलेली आणि अल्झायमर आजाराने त्रस्त असलेली ही व्यक्तिरेखा त्यांनी अत्यंत संयत आणि भावनिक पद्धतीने जिवंत केली. आपल्या मुलासोबत राहणाऱ्या या आईच्या आयुष्याभोवती ही कथा फिरते, जिथे नात्यांमधील गुंतागुंत आणि आई-मुलाच्या नात्याचा वेदनादायी प्रवास दाखवण्यात आला आहे.
Asha Bhosle Mai Movie Acting Debut
चित्रपटाची कथा काही समीक्षकांना विशेष भावली नाही, मात्र आशा भोसले यांच्या अभिनयाचं सर्वत्र कौतुक झालं. नवख्या अभिनेत्री असूनही त्यांनी साकारलेली भूमिका प्रेक्षकांच्या मनाला भिडणारी ठरली.
या चित्रपटात पद्मिनी कोल्हापुरी, राम कपूर, क्षिती जोग आणि अनुपम खेर यांच्याही महत्त्वाच्या भूमिका होत्या.
एका मुलाखतीत आशा भोसले यांनी सांगितलं होतं की, ‘माई’ मधील आईची भूमिका साकारताना त्यांना फारसं अभिनय करावं लागलंच नाही. त्यांच्या मते, आईची भावना त्यांच्यात नैसर्गिकरित्या होती. त्यांनी सांगितलं होतं की, “गायनापेक्षा अभिनय सोपा वाटतो. गाण्यात सगळ्या भावना एका टेकमध्ये व्यक्त कराव्या लागतात, पण अभिनयात त्या टप्प्याटप्प्याने मांडता येतात.”
असं असूनही, त्यांनी अभिनय क्षेत्रात पुढे जाण्याचा निर्णय घेतला नाही. त्यांनी स्पष्ट सांगितलं की, त्या एक गायिका म्हणूनच अधिक समाधानी आहेत. ‘एकदा गायिका, कायमची गायिका’ असं म्हणत त्यांनी आपल्या खऱ्या ओळखीशी प्रामाणिक राहणं पसंत केलं.
‘माई’ चित्रपटाच्या प्रदर्शनाच्या काही काळ आधी त्यांच्या मुलगी वर्षा आणि जवळचे मित्र गौतम राजाध्यक्ष यांचं निधन झालं होतं. या दोघांना आपला चित्रपट पाहता आला नाही, ही खंत त्यांनी व्यक्त केली होती.
सुमारे आठ दशकांच्या कारकिर्दीत आशा भोसले यांनी हजारो गाणी गायली आणि अनेक पुरस्कारांनी सन्मानित झाल्या. राष्ट्रीय पुरस्कार, फिल्मफेअर आणि महाराष्ट्र राज्य पुरस्कार यांसारख्या सन्मानांनी त्यांची कारकीर्द उजळून निघाली. त्या लता मंगेशकर यांच्या धाकट्या बहिण होत्या.
11 एप्रिल रोजी त्यांच्या नात झनाई भोसले यांनी सोशल मीडियावर त्यांच्या तब्येतीबाबत माहिती दिली होती. मात्र, दुसऱ्याच दिवशी सकाळी त्यांनी अखेरचा श्वास घेतला आणि संगीतविश्वावर शोककळा पसरली.
गायकीच्या जगात अमिट ठसा उमटवणाऱ्या आशा भोसले यांनी ‘माई’ मधून अभिनयातही आपली छाप सोडली. त्यांच्या या अनोख्या प्रवासाची आठवण कायमच रसिकांच्या मनात जिवंत राहील.
