मराठी चित्रपटसृष्टीत वेगळ्या विषयांवर आधारित चित्रपटांची निर्मिती सातत्याने होत आहे. याच प्रवाहात ‘संडे १९९६’ हा रहस्य आणि भावनांची सांगड घालणारा चित्रपट लवकरच प्रेक्षकांच्या भेटीला येणार आहे. कोकणाच्या निसर्गरम्य वातावरणात घडणाऱ्या या कथेत भूतकाळ आणि वर्तमान यांच्यातील नातं महत्त्वाची भूमिका बजावतं.
व्ही.आर.के फिल्मसची निर्मिती असलेल्या या चित्रपटाची निर्मिती नीलांबरी विक्रांत यांनी केली आहे. जीवन राजेंद्र चव्हाण यांनी चित्रपटाचं लेखन आणि दिग्दर्शन केलं आहे. ओंकार राऊत, गणेश यादव, पंकज विष्णू, सुनील गोडबोले, शिवानी बने, सायली पाचपुते आणि गौरवी महांगडे हे कलाकार या चित्रपटात प्रमुख भूमिकांमध्ये दिसणार आहेत.
‘संडे १९९६’च्या पोस्टरचं नुकतंच अनावरण करण्यात आलं. राज्याचे कॅबिनेट मंत्री भरतशेठ गोगावले यांच्या हस्ते हे पोस्टर प्रदर्शित करण्यात आलं. यावेळी त्यांनी चित्रपटाच्या संपूर्ण टीमला शुभेच्छा दिल्या.
चित्रपटाची कथा केवळ एका रहस्याभोवती मर्यादित नसून त्यात माणसाच्या आयुष्यातील नाती आणि भूतकाळाचा वर्तमानावर होणारा परिणाम यांचा वेध घेतला जाणार आहे. काळाच्या बदलत्या संदर्भातून पात्रांच्या आयुष्यात घडणाऱ्या घटना या कथेला पुढे घेऊन जातात.
निर्मात्या नीलांबरी विक्रांत यांच्या मते, ‘संडे १९९६’मधून रहस्यकथेची मांडणी करताना काळ, नाती आणि माणसाच्या भूतकाळाकडे वेगळ्या नजरेने पाहण्याचा प्रयत्न करण्यात आला आहे. त्यामुळे हा चित्रपट केवळ थरार निर्माण करणारा न राहता भावनिक पातळीवरही प्रेक्षकांशी जोडला जाईल, अशी त्यांची भूमिका आहे.
दिग्दर्शक जीवन चव्हाण यांच्यासाठीही रहस्य टिकवून ठेवतानाच कथेतली भावनिक बाजू प्रभावीपणे मांडणं हे महत्त्वाचं होतं. प्रेक्षकांनी केवळ पुढे काय होणार याची उत्सुकता ठेवण्यापेक्षा कथेत घडणाऱ्या प्रसंगांचा अनुभव घ्यावा, असा चित्रपटाच्या मांडणीमागचा प्रयत्न आहे.
या सिनेमाच्या कथेला कोकणाची पार्श्वभूमी मिळाली आहे. कोकणातील निसर्ग, परिसर आणि त्यातून निर्माण होणारं गूढ वातावरण कथानकाला वेगळी दृश्यात्मक बाजू देतं. त्यामुळे चित्रपटातील रहस्याला केवळ कथानकातून नव्हे, तर लोकेशनमधूनही अधोरेखित करण्याचा प्रयत्न करण्यात आला आहे.
काळाच्या प्रवाहात घडणारे बदल आणि त्याचा माणसाच्या वर्तमान आयुष्यावर होणारा परिणाम हा ‘संडे १९९६’चा महत्त्वाचा धागा आहे. भूतकाळ आणि वर्तमान यांच्यातील सीमारेषा धूसर होत असताना पात्रांसमोर कोणती रहस्यं उलगडतात, हे चित्रपटातून समोर येणार आहे.
ओंकार राऊत, गणेश यादव यांच्यासह अनुभवी आणि युवा कलाकारांची फळी या चित्रपटात असल्याने त्यांच्या भूमिकांकडेही लक्ष लागलं आहे. कोकणाच्या पार्श्वभूमीवर उलगडणारं रहस्य आणि नात्यांच्या भावनिक गुंतागुंतीची सांगड ‘संडे १९९६’मध्ये कशी घातली आहे, हे चित्रपट प्रदर्शित झाल्यानंतर स्पष्ट होईल.
==========
हे देखील वाचा : गश्मीर महाजनी दिग्दर्शकाच्या भूमिकेत; ‘राखणदार’चं गूढ पोस्टर चर्चेत
==========