नाताळ म्हणजे आनंद, भेटवस्तू आणि मनमोकळं हसू… आणि याच नाताळच्या शुभमुहूर्तावर मराठी प्रेक्षकांसाठी हास्याची एक खास भेट जाहीर झाली आहे! प्रेक्षकांच्या मनावर अधिराज्य गाजवणारे ‘कुरळे ब्रदर्स’ पुन्हा एकदा मोठ्या पडद्यावर धमाल करायला सज्ज झाले आहेत. ‘पुन्हा एकदा साडे माडे तीन’ या बहुप्रतिक्षित मराठी चित्रपटाचं नवं पोस्टर नुकतंच सोशल मीडियावर झळकलं असून हा चित्रपट ३० जानेवारी २०२६ रोजी चित्रपटगृहात प्रदर्शित होणार आहे.
नव्या पोस्टरकडे पाहताच एक गोष्ट प्रकर्षाने जाणवते. या वेळी गोंधळही डबल आहे आणि धमालही! साध्या परिस्थितीतून निर्माण होणारा अफाट गोंधळ हीच ‘साडे माडे तीन’ची ओळख असून, नव्या पोस्टरमधूनही तोच मजेशीर गोंधळ ठळकपणे समोर येतो. त्यामुळेच चित्रपटाबद्दलची उत्सुकता दिवसेंदिवस वाढत चालली आहे.
‘साडे माडे तीन’चा पहिला भाग आजही मराठी प्रेक्षकांच्या आठवणीत ताजा आहे. भावंडांमधील जिव्हाळा, निरागस विनोद आणि पोट धरून हसवणारे प्रसंग यामुळे हा चित्रपट प्रेक्षकांच्या मनात कायमचा घर करून बसला. विशेष म्हणजे या अविस्मरणीय चित्रपटाचं दिग्दर्शन अंकुश चौधरी यांनीच केलं होतं. अभिनेता म्हणून लोकप्रिय असलेले अंकुश चौधरी दिग्दर्शक म्हणूनही तितकेच प्रभावी असल्याचं त्यांनी वारंवार सिद्ध केलं आहे. मनोरंजन आणि कथन यांचा अचूक समतोल साधणारी त्यांची दिग्दर्शकीय हातोटीच ‘साडे माडे तीन’च्या यशामागचं मोठं कारण ठरली होती.
आता तब्बल एकोणीस वर्षांनंतर, त्या आठवणींना उजाळा देत आणि आजच्या काळाशी नाळ जोडत ‘पुन्हा एकदा साडे माडे तीन’ प्रेक्षकांच्या भेटीला येत आहे. अनुभवी दिग्दर्शकाच्या हातात ही कथा पुन्हा साकारली जात असल्यामुळे, यावेळी हास्याबरोबरच कथेतली पकडही तितकीच भक्कम असणार, याची प्रेक्षकांना खात्री वाटतेय.
निर्मात्या उषा काकडे म्हणतात, “हा चित्रपट म्हणजे फक्त पुढचा भाग नाही, तर प्रेक्षकांच्या आठवणींवरची प्रेमाची फुंकर आहे. त्यामुळे प्रत्येक गोष्ट मनापासून आणि जपून केली आहे.”
निर्माते अमेय खोपकर सांगतात, “पहिला चित्रपट पाहून मोठा झालेला प्रेक्षक आणि आजचा तरुण प्रेक्षक—दोघांनाही एकत्र हसवणं हीच आमची खरी परीक्षा होती, आणि ती आम्ही यशस्वीपणे पार पाडली आहे.”
तर निर्माते पुष्कर यावलकर म्हणतात, “आजच्या धावपळीच्या आयुष्यात दोन-अडीच तास मनमुराद हसता आलं, तर त्याहून मोठं यश नाही.”
सुशीलकुमार अग्रवाल आणि अल्ट्रा मीडिया ॲण्ड एंटरटेनमेंट प्रस्तुत, उषा काकडे प्रॉडक्शन्स, ईओडी. मीडिया यांच्या उदाहरणार्थ निर्मितीतील आणि अमेय विनोद खोपकर पिक्चर्स यांच्या सहकार्याने प्रदर्शित होणाऱ्या या चित्रपटाचे उषा काकडे, पुष्कर यावलकर, सुधीर कोलते, स्वाती खोपकर आणि निनाद नंदकुमार बत्तीन हे निर्माते आहेत. मोहसिन खान, यशराज टिळेकर, सौरभ ललवाणी आणि धनविक एंटरटेनमेंट सहनिर्माते असून स्मिथ पीटर तेलगोटे सहायक निर्माता आहेत.
अंकुश चौधरी यांची कथा, संदीप दंडवते यांची पटकथा व संवाद असलेल्या या चित्रपटात अशोक सराफ, भरत जाधव, मकरंद अनासपुरे, सिद्धार्थ जाधव, रिंकू राजगुरू, संकेत पाठक, संजय नार्वेकर आणि समृद्धी केळकर यांच्या प्रमुख भूमिका आहेत. चित्रपटाचं छायाचित्रण प्रसिद्ध छायाचित्रकार संजय जाधव यांनी केलं आहे.
=====
हे देखील वाचा : आयुष संजीव – अनुष्का सरकटेची ‘जब्राट’ जोडी अखेर मराठी रुपेरी पडद्यावर
=====
