नितेश तिवारी दिग्दर्शित ‘रामायण’ हा बहुप्रतिक्षित चित्रपट सध्या सातत्याने चर्चेत आहे. या भव्य पौराणिक महाकाव्यावर आधारित चित्रपटात कोणकोणते कलाकार दिसणार याची उत्सुकता चाहत्यांमध्ये मोठ्या प्रमाणात आहे. अलीकडेच रणबीर कपूर, साई पल्लवी, यश आणि सनी देओल यांची स्टारकास्ट जाहीर झाल्यानंतर आणखी एक नाव चर्चेत आलं आहे – ते म्हणजे प्रियांका चोप्रा.
होय, मिळालेल्या माहितीप्रमाणे निर्मात्यांनी प्रियांका चोप्राला ‘रामायण’मध्ये एक महत्त्वपूर्ण भूमिका देण्याचा विचार केला होता – शूर्पणखा! या खास पात्रासाठी निर्मात्यांनी थेट प्रियांकाला संपर्क केला होता. मात्र तिचं आंतरराष्ट्रीय प्रोजेक्ट्स आणि बिझी शेड्यूल पाहता, तिला या चित्रपटात सहभागी होता आलं नाही. शेड्यूल मॅच न झाल्यामुळे प्रियांकाने ही ऑफर नम्रपणे नाकारली.
प्रियांकाच्या जागी आता ही भूमिका रकुल प्रीत सिंह साकारणार आहे. सूत्रांच्या म्हणण्यानुसार, निर्मात्यांना रकुल या भूमिकेसाठी परफेक्ट वाटली. तिचं व्यक्तिमत्त्व आणि अभिनयकौशल्य पाहता ती शूर्पणखासाठी अत्यंत योग्य आहे. सध्या रकुलने या भूमिकेसाठी मेहनत सुरू केली असून, ती भूमिकेत रंगून जाण्यास सज्ज आहे.
‘रामायण’च्या इतर पात्रांबद्दल बोलायचं झालं, तर रणबीर कपूर भगवान रामाच्या भूमिकेत झळकणार आहे, तर साई पल्लवी तिच्या पहिल्याच हिंदी सिनेमात सीतेची भूमिका साकारणार आहे. कन्नड सुपरस्टार यश रावणाच्या भूमिकेत तर सनी देओल हनुमानाच्या भूमिकेत दिसणार आहेत. तसेच, अमिताभ बच्चन जटायू तर लारा दत्ता कैकेयी आणि काजल अग्रवाल मंदोदरी या भूमिकांमध्ये झळकतील, अशी माहिती समोर आली आहे.
हा चित्रपट दोन भागांमध्ये प्रदर्शित होणार असून, पहिला भाग २०२६ मध्ये आणि दुसरा भाग २०२७ मध्ये प्रेक्षकांच्या भेटीला येणार आहे. सुमारे ८०० कोटींच्या बजेटमध्ये तयार होणारा हा सिनेमा भारतीय चित्रपटसृष्टीतील सर्वात महागड्या प्रोजेक्ट्सपैकी एक मानला जात आहे.
जसजशी कास्टिंग आणि शूटिंगची माहिती समोर येते आहे, तसतशी या भव्य ‘रामायण’कडे प्रेक्षकांची उत्सुकता अधिकच वाढते आहे.
