थलपती विजयच्या कारकिर्दीतील शेवटचा चित्रपट म्हणून ‘Jan Neta’ बद्दल प्रेक्षकांमध्ये मोठी उत्सुकता होती. राजकीय पार्श्वभूमी, मोठा संघर्ष आणि विजयची मास अपील यामुळे हा चित्रपट सुरुवातीपासूनच लक्ष वेधून घेतो. मात्र हा फक्त अॅक्शन पट नाही; तो नातेसंबंध, जबाबदारी आणि विचारसरणींच्या संघर्षाचीही गोष्ट सांगण्याचा प्रयत्न करतो. (Jan Neta Movie Review)
चित्रपटाची कथा एका अशा व्यक्तीभोवती फिरते जी लोकांसाठी लढण्यावर विश्वास ठेवते, तर तिच्यासमोर उभा असलेला विरोधक सत्तेला सर्वोच्च मानतो. या संघर्षासोबतच एका तरुणीच्या आयुष्याला दिशा देणारा भावनिक प्रवासही समांतर सुरू राहतो. चित्रपटात अनेक स्तर आहेत आणि ते सर्व एकाच वेळी उलगडत जातात.
पहिला अर्धा भाग मोठ्या प्रमाणावर पात्रांची ओळख, फ्लॅशबॅक आणि विविध घटनांमध्ये वेळ घालवतो. त्यामुळे काही ठिकाणी चित्रपटाचा वेग कमी झाल्यासारखा वाटतो. अनेक उपकथानकांमुळे कथानकाचा मुख्य धागा थोडा मागे पडतो आणि काही प्रसंग अधिक संक्षिप्त असते तर परिणाम अधिक प्रभावी झाला असता, अशी भावना निर्माण होते.
मात्र इंटरव्हलनंतर चित्रपट अधिक जोमाने पुढे सरकतो. प्रमुख पात्रांमधील संघर्ष, मोठ्या प्रमाणावर सादर केलेले अॅक्शन सीक्वेन्स आणि भावनिक प्रसंग प्रेक्षकांना पुन्हा गुंतवून ठेवतात. विशेषतः विजय आणि प्रकाश राज यांच्यातील संवादप्रधान प्रसंग चित्रपटाला वेगळी ऊर्जा देतात.
थलपती विजय हा या चित्रपटाचा सर्वात मोठा आधार आहे. स्क्रीनवर त्याची उपस्थिती प्रत्येक फ्रेमला वेगळं वजन देते. अॅक्शन असो, भावनिक प्रसंग असोत किंवा चाहत्यांसाठी खास ठेवलेले ‘मास’ क्षण विजय प्रत्येक ठिकाणी प्रभाव टाकतो. त्याची नृत्यदृश्येही नेहमीप्रमाणे लक्ष वेधून घेतात.
बॉबी देओलने खलनायकाची भूमिका दमदार साकारली आहे. त्याचा पडद्यावरील वावर प्रभावी आहे, पण हिंदी डबिंगमुळे काही प्रसंगांमध्ये त्याच्या अभिनयाची खरी धार पूर्णपणे जाणवत नाही. त्याचा स्वतःचा आवाज असता, तर या व्यक्तिरेखेचा प्रभाव आणखी वाढला असता. ममिता बैजूला भावनिक बाजू उभी करण्याची संधी मिळते, तर पूजा हेगडेला मर्यादित वाव असल्यामुळे तिची भूमिका फारशी लक्षात राहत नाही. प्रकाश राज नेहमीप्रमाणे आपल्या अनुभवाचा ठसा उमटवतात. (Jan Neta Movie Review)
दिग्दर्शक एच. विनोथ यांनी चित्रपट भव्य पातळीवर उभा केला आहे. अॅक्शन, कॅमेरा वर्क आणि दृश्यरचना यामध्ये त्यांची पकड स्पष्ट दिसते. मात्र एकाच चित्रपटात अनेक कल्पना, राजकीय स्तर, भावनिक ट्रॅक आणि फ्लॅशबॅक सामावण्याच्या प्रयत्नात कथानक काही ठिकाणी विस्कळीत झाल्यासारखे वाटते.
तांत्रिकदृष्ट्या चित्रपट मजबूत आहे. सिनेमॅटोग्राफी भव्य आणि आकर्षक आहे. अॅक्शन दृश्यांची मांडणी मोठ्या पडद्यावर प्रभाव टाकते. अनिरुद्ध रविचंदरचे पार्श्वसंगीत प्रसंगांना चांगली साथ देते, जरी हिंदी प्रेक्षकांच्या लक्षात राहील असं एखादं गाणं चित्रपटात जाणवत नाही. संपादन अधिक धारदार असतं तर चित्रपटाचा परिणाम निश्चितच वाढला असता.
‘Jan Neta’ हा फक्त विजयच्या चाहत्यांसाठी तयार केलेला चित्रपट नाही; त्यात अॅक्शन, भावना आणि सामाजिक संदेश यांचा समतोल साधण्याचा प्रयत्न आहे. मात्र जवळपास प्रत्येक कल्पनेला पुरेसा वेळ देण्याच्या प्रयत्नामुळे चित्रपटाची लांबी जाणवते. त्यामुळे काही प्रेक्षकांना हा प्रवास थोडा थकवणारा वाटू शकतो. (Jan Neta Movie Review)
थलपती विजयचे चाहते असाल, तर ‘Jan Neta’ तुम्हाला नक्कीच आवडेल. त्याचा दमदार स्क्रीनप्रेझेन्स, मोठ्या प्रमाणावर सादर केलेले अॅक्शन सीक्वेन्स आणि ‘मास’ क्षण प्रेक्षकांची चांगली करमणूक करतात. मात्र घट्ट आणि वेगवान कथा अपेक्षित असेल, तर काही ठिकाणी चित्रपटाची लांबी जाणवू शकते. तरीही विजयच्या करिष्म्यामुळे हा प्रवास शेवटपर्यंत गुंतवून ठेवतो. पटकथेवर थोडं अधिक काम झालं असतं, तर ‘Jan Neta’ आणखी प्रभावी ठरला असता.
सिनेमा : Jan Neta (Jana Nayagan)
दिग्दर्शन : एच. विनोथ (H. Vinoth)
लेखन : एच. विनोथ
निर्मिती : KVN Productions
कलाकार : थलपती विजय, बॉबी देओल, ममिता बैजू, पूजा हेगडे, प्रकाश राज, प्रियामणी, नास्सर, गौतम वासुदेव मेनन, रेवती, सुनील
दर्जा : ⭐⭐⭐☆☆ (3/5)
========
हे देखील वाचा : The Odyssey Review : युद्ध जिंकणं सोपं असतं… पण स्वतःच्या मनावर विजय मिळवणं सर्वात कठीण
========