मराठी चित्रपटसृष्टीत सस्पेन्स आणि क्राईम थ्रिलरच्या माध्यमातून वेगळी कथा मांडणारा ‘दशमी’ हा चित्रपट लवकरच प्रेक्षकांच्या भेटीला येणार आहे. योगेश पांडुरंग भोसले यांनी दिग्दर्शित केलेल्या या चित्रपटाचे पहिले पोस्टर नुकतेच प्रदर्शित करण्यात आले. ऑक्टोबरमध्ये हा चित्रपट प्रदर्शित होणार आहे. (Dashami Marathi Movie)
‘दशमी’ या नावामागे विजय आणि अन्यायाविरोधात उभे राहण्याचा विचार केंद्रस्थानी असल्याचे चित्रपटाच्या टीमकडून सांगण्यात आले आहे. विजयादशमीच्या सांस्कृतिक संदर्भातून प्रेरणा घेत हा विषय आजच्या सामाजिक वास्तवाशी जोडण्याचा प्रयत्न करण्यात आला आहे.
चित्रपटाच्या कलाकारांची फळीही लक्षवेधी आहे. महेश मांजरेकर, मकरंद अनासपुरे, विजय निकम, गौरी इंगवले, प्रसन्न केतकर, देवेंद्र गायकवाड, शाम माशाळकर, राज कुंदन आणि दाक्षिणात्य अभिनेते रवि प्रकाश हे कलाकार ‘दशमी’मध्ये महत्त्वाच्या भूमिकांमध्ये दिसणार आहेत.
चित्रपटाची कथा सस्पेन्स आणि रहस्याभोवती फिरते. कथानकातील अनेक गोष्टी सुरुवातीपासून स्पष्ट न करता त्या टप्प्याटप्प्याने उलगडण्याची रचना करण्यात आल्याचे सांगण्यात आले आहे. त्यामुळे कथेत पुढे काय घडणार, याची उत्सुकता कायम ठेवण्याचा प्रयत्न चित्रपटातून करण्यात आला आहे.
दिग्दर्शक योगेश पांडुरंग भोसले यांच्या मते, ‘दशमी’ हा केवळ मनोरंजनापुरता मर्यादित नसून अन्यायाविरोधात उभे राहण्याच्या धैर्याचा विचार मांडणारा चित्रपट आहे. प्रत्येक कुटुंबाला आणि विशेषतः मुलींना आत्मविश्वास व बळ देणारा संदेश चित्रपटातून मांडण्याचा प्रयत्न करण्यात आला असल्याचे त्यांनी सांगितले.
‘दशमी’च्या तांत्रिक बाजूवरही विशेष लक्ष देण्यात आल्याचे निर्मात्यांचे म्हणणे आहे. भव्य दृश्यरचना आणि उच्च दर्जाचे तांत्रिक सादरीकरण करण्याचा प्रयत्न करण्यात आला असून प्रत्येक फ्रेमवर बारकाईने काम केल्याचे सांगण्यात आले आहे. (Dashami Marathi Movie)
चित्रपटाच्या लेखन आणि संगीताची जबाबदारी सुरेश पंडित यांनी सांभाळली आहे. रहस्य, क्राईम आणि अनपेक्षित वळणांमधून कथा पुढे नेण्याचा प्रयत्न या चित्रपटात करण्यात आला आहे.
केएनके बॉक्स प्रस्तुत ‘दशमी’चे दिग्दर्शन आणि निर्मिती योगेश पांडुरंग भोसले यांनी केली आहे. महेश मांजरेकर आणि मकरंद अनासपुरे यांसारख्या अनुभवी कलाकारांसोबतची ही स्टारकास्ट आणि सस्पेन्स-क्राईम थ्रिलरची मांडणी यामुळे चित्रपटाकडे लक्ष लागले आहे. ऑक्टोबरमध्ये ‘दशमी’ मोठ्या पडद्यावर दाखल होणार आहे.
========
हे देखील वाचा : Sammarth Trailer : दोन पिढ्यांतील संघर्ष आणि समर्थ विचारांची प्रेरणा; 14 ऑगस्टला चित्रपट प्रदर्शित
========