मराठी चित्रपटसृष्टीत आणखी एका वेगळ्या धाटणीच्या कॉमेडी चित्रपटाची भर पडणार आहे. ‘मांजर’ या आगामी मराठी चित्रपटाचं पोस्टर प्रदर्शित करण्यात आलं असून, पोस्टरमधील दृश्यांनी चित्रपटाच्या कथेबाबत उत्सुकता निर्माण केली आहे. तीन मित्र, घरातला अस्ताव्यस्त पसारा आणि त्यांचं अगदी बिनधास्त जगणं या पोस्टरमधून समोर येतं. (Manjar Marathi Film)
सिद्धार्थ मेनन, ओंकार भोजने, तेजस राऊत आणि भाग्यश्री लिमये पोस्टरमध्ये एकत्र दिसतात. घरातील कपडे, मोबाईल, लॅपटॉप, इअरफोन्स, बॅग्ज आणि इतर वस्तूंच्या पसाऱ्यामध्ये ही पात्रं निवांतपणे वावरताना दिसतात. या संपूर्ण दृश्यात ‘मांजर’ या शीर्षकाचा नेमका संबंध काय, हा प्रश्न मात्र अनुत्तरित ठेवण्यात आला आहे.
दिग्दर्शक सुशील महादेव यांच्या या चित्रपटातून तीन मित्रांचं मोकळंढाकळं विश्व उलगडणार आहे. त्यांच्या रोजच्या आयुष्यात घडणाऱ्या काही घटनांमुळे निर्माण होणाऱ्या विनोदी परिस्थितीवर चित्रपटाची कथा आधारलेली असल्याची माहिती देण्यात आली आहे.
चित्रपटाच्या कथेत मांजराला महत्त्वाचं स्थान आहे. मात्र ते या मित्रांच्या आयुष्यात नेमकं कोणत्या प्रकारे येतं आणि त्यानंतर कोणत्या घटना घडतात, याबाबत निर्मात्यांनी सध्या अधिक माहिती जाहीर केलेली नाही. त्यामुळे पोस्टरने कथानकाची उत्सुकता वाढवण्याचं काम केलं आहे.
दिग्दर्शक सुशील महादेव यांच्या मते, ‘मांजर’मधील तीन मित्रांचं जग आणि त्यातून निर्माण होणाऱ्या परिस्थिती हा चित्रपटाचा महत्त्वाचा भाग आहे. मांजर त्यांच्या जगाचा आधीपासूनच एक भाग आहे. मात्र त्याच्याभोवती घडणाऱ्या घटनांमुळे त्यांच्या आयुष्यात मजेशीर प्रसंग निर्माण होतात. पात्रांमधील केमिस्ट्री, कॉमेडी आणि या गोंधळामागचं कारण चित्रपटातून समोर येणार आहे.
एचथ्रीओ मोशन पिक्चर्स आणि जस्ट राईट फिल्म्सची निर्मिती असलेल्या ‘मांजर’मध्ये सिद्धार्थ मेनन, ओंकार भोजने, तेजस राऊत आणि भाग्यश्री लिमये यांच्या प्रमुख भूमिका आहेत. त्यांच्यासोबत सयाजी शिंदे, अंशुमन विचारे, वैष्णवी अंधाडे आणि अश्विनी काळसेकर हे कलाकारही महत्त्वाच्या भूमिकांमध्ये दिसणार आहेत.
हर्ष, अविनाश शर्मा, हरि राजपूत, बंटी नागी आणि जसबीर नागी यांनी चित्रपटाची निर्मिती केली आहे. सुशील महादेव यांनी दिग्दर्शनाची जबाबदारी सांभाळली आहे, तर चित्रपटाचं वितरण एए फिल्म्सकडे आहे. (Manjar Marathi Film)
‘मांजर’ नेमकं कोणत्या गोंधळाची कथा सांगणार, या प्रश्नाचं उत्तर सध्या पडद्यामागेच ठेवण्यात आलं आहे. त्यामुळे चित्रपटाचं पोस्टर पाहिल्यानंतर या शीर्षकाचा तीन मित्रांच्या आयुष्याशी असलेला संबंध जाणून घेण्याची उत्सुकता कायम आहे. हा चित्रपट १८ सप्टेंबर २०२६ रोजी सर्वत्र प्रदर्शित होणार आहे.
=======
हे देखील वाचा : ‘संडे १९९६’चा थरार कोकणाच्या पार्श्वभूमीवर; पोस्टर प्रदर्शित
=======