२१ मे रोजी प्रदर्शित होणार बॉबी देओल अभिनीत ‘बंदर’चा ट्रेलर!
निखिल द्विवेदी यांच्या सॅफ्रन मॅजिकवर्क्स आणि Zee Studios यांच्या बॅनरखाली तयार झालेल्या ‘बंदर’चे दिग्दर्शन अनुराग कश्यप यांनी केले आहे. चित्रपटात बॉबी देओल मुख्य भूमिकेत दिसणार असून त्यांच्यासोबत अनेक दमदार कलाकार झळकणार आहेत. बहुप्रतिक्षित हा चित्रपट ५ जून २०२६ रोजी जगभरातील चित्रपटगृहांत प्रदर्शित होणार आहे.
‘बंदर’ हा २०२६ मधील चर्चेत असलेल्या चित्रपटांपैकी एक मानला जात आहे. चित्रपटाशी संबंधित प्रत्येक नव्या अपडेटमुळे प्रेक्षकांची उत्सुकता वाढताना दिसत आहे. बॉबी देओल आणि अनुराग कश्यप यांचा हा पहिलाच एकत्रित चित्रपट असल्याने सुरुवातीपासूनच या सिनेमाबद्दल प्रेक्षकांमध्ये विशेष चर्चा पाहायला मिळत आहे. चित्रपटाच्या झलकफितीने आणि पहिल्या गीताने प्रेक्षकांना चित्रपटाच्या वेगळ्या मांडणीची झलक दिली होती.
चित्रपटाच्या प्रदर्शनाची तारीख जवळ येत असताना आता ट्रेलरची उत्सुकता अधिक वाढली आहे. निर्माते २१ मे रोजी ‘बंदर’चा ट्रेलर प्रदर्शित करण्याच्या तयारीत आहेत.
चित्रपटाच्या झलकफितीमध्ये बॉबी देओल यांचा वेगळा लूक, चित्रपटाची दृश्यरचना आणि कथानकाची झलक प्रेक्षकांच्या पसंतीस उतरली होती. त्यामुळे आता ट्रेलरमधून चित्रपटाबद्दल आणखी काही नवीन पाहायला मिळणार का, याकडे सर्वांचे लक्ष लागले आहे. चित्रपटात सान्या मल्होत्रा, राज बी शेट्टी, सपना पब्बी, सबा आझाद, ऋद्धी सेन, जितेंद्र जोशी, इंद्रजीत आणि नागेश भोसले हे कलाकारही महत्त्वाच्या भूमिकांमध्ये दिसणार आहेत.
अनुराग कश्यप दिग्दर्शित या चित्रपटाचे लेखन ‘पाताळ लोक’, ‘कोहरा’ आणि ‘उडता पंजाब’सारख्या चर्चित प्रोजेक्ट्सशी जोडले गेलेले सुदीप शर्मा आणि अभिषेक बॅनर्जी यांनी केले आहे. वेगळ्या धाटणीची कथा आणि प्रभावी मांडणी हे या चित्रपटाचे वैशिष्ट्य असल्याचे बोलले जात आहे.
‘बंदर’चे लेखन सुदीप शर्मा आणि अभिषेक बॅनर्जी यांनी केले असून दिग्दर्शन अनुराग कश्यप यांनी केले आहे. निखिल द्विवेदी यांच्या सॅफ्रन मॅजिकवर्क्सने Zee Studios यांच्या सहकार्याने या चित्रपटाची निर्मिती केली आहे. ‘बंदर’ ५ जून २०२६ रोजी जगभरातील चित्रपटगृहांत प्रदर्शित होणार आहे.
=====
हे देखील वाचा : Pati Patni Aur Woh Do Review : आयुष्मान खुरानाच्या चित्रपटात गोंधळ, कॉमेडी आणि मनोरंजनाचा भन्नाट तडका
=====