Sushant Singh Rajput Death Anniversary : आज पाच वर्षे झालीत, त्या काळजाला चिरून गेलेल्या दिवशीला. १४ जून २०२० — जेव्हा अभिनेता सुशांत सिंह राजपूत आपल्या चाहत्यांचा कायमचा निरोप घेत गेला. पण आयुष्य संपल्यानंतरही सुशांतच्या आठवणींचा पडदा आजही हलतोय, मनात एक हळवा ठाव घेतोय.
सुशांत हा केवळ एक अभिनेता नव्हता, तो एक विचार होता. त्याच्या डोळ्यांत स्वप्नं होती आणि त्या स्वप्नांचा पाठपुरावा करणारी जिद्द होती. आजही सोशल मीडियावर त्याचे फोटो-व्हिडीओ व्हायरल होत असतात. चाहत्यांसाठी तो फक्त एक स्टार नव्हता, तर भावनिक नातं होतं.
अभिनय प्रवासाची सुरुवात आणि अनोळखी गोष्ट
2013 मध्ये ‘काय पो चे’ या सिनेमातून सुशांतने बॉलिवूडमध्ये दमदार प्रवेश केला. पण त्याआधी छोट्या पडद्यावर त्याने एक वेगळा ठसा उमटवला. बहुतांश लोकांना वाटतं की ‘पवित्र रिश्ता’ हीच त्याची पहिली मालिका होती. पण खरंतर, त्याने अभिनयाची सुरुवात ‘किस देश में है मेरा दिल’ या मालिकेतून केली होती.
दिल्लीमध्ये इंजिनीयरिंगचे शिक्षण घेत असताना सुशांतने एका डान्स अकॅडमीत प्रवेश घेतला. २००५ साली एका डान्स ग्रुपसोबत तो मुंबईत आला आणि नशिबानं त्याला एकता कपूरच्या ऑडिशन रूममध्ये पोहोचवलं. ‘किस देश में है मेरा दिल’साठी झालेल्या ऑडिशनमध्ये पहिल्याच फेरीत एकता कपूरला सुशांत आवडला. त्यानंतर ‘पवित्र रिश्ता’मध्ये मुख्य भूमिकेसाठी त्याची निवड झाली.
छोट्या पडद्यावरून मोठ्या पडद्याकडे
‘पवित्र रिश्ता’मध्ये २०११ पर्यंत काम केल्यानंतर सुशांतने आपला मोर्चा सिनेसृष्टीकडे वळवला. ‘काय पो चे’ नंतर ‘एमएस धोनी: द अनटोल्ड स्टोरी’, ‘राबता’, ‘केदारनाथ’, ‘छिछोरे’ अशा यशस्वी सिनेमांतून त्याने आपली ओळख भक्कम केली.
त्याचा शेवटचा सिनेमा ‘दिल बेचारा’ होता, जो त्याच्या निधनानंतर ओटीटी प्लॅटफॉर्मवर प्रदर्शित झाला. हा चित्रपट पाहताना प्रेक्षकांच्या डोळ्यांत पाणी आलं, कारण तो केवळ एक सिनेमा नव्हता, तर सुशांतच्या आयुष्याचं शेवटचं पान होतं.
पाच वर्षांनंतरही त्याचं अस्तित्व कायम
जग सोडलं, पण आठवणींमध्ये तो अजूनही जिवंत आहे. प्रत्येक पोस्ट, प्रत्येक फोटो, त्याच्या बोलण्यातला आत्मविश्वास आणि डोळ्यांतली चमक – हे सगळं आजही जसं होतं तसंच आहे. सुशांतने अभिनयाव्यतिरिक्त आयुष्याकडे पाहण्याचा दृष्टिकोन दिला, जो आजच्या तरुणांसाठी प्रेरणा आहे.
ज्यांनी त्याला ओळखलं, त्यांच्यासाठी तो एक आठवण बनला. आणि जे अजूनही त्याच्याबद्दल शोध घेत आहेत, त्यांच्यासाठी सुशांत म्हणजे एक गूढ – एक अधूरं स्वप्न.