सध्या मराठी चित्रपटसृष्टीत एक नाव चांगलंच चर्चेत आहे – ‘मना’चे श्लोक’. काही दिवसांपासून सोशल मीडियावर मृण्मयी देशपांडे एका अनोख्या भूमिकेत, सहा नायकांसोबत दिसणार असल्याची चर्चा रंगत होती. आणि अखेर, त्या चर्चेला पूर्णविराम देणारे पहिलं पोस्टर प्रदर्शित झालं आहे.
पोस्टरमध्ये मृण्मयीसोबत झळकणारा अभिनेता म्हणजे राहुल पेठे. दोघांच्याही चेहऱ्यावरचे भाव, त्यांचं अंतरंग, सगळं काही खूप सांगून जातं. पण, त्यांच्या नात्याचं नेमकं स्वरूप काय? एकमेकांविषयीचे विचार? लग्नाबाबत त्यांचं मतभेद? हे सगळं जाणून घेण्यासाठी प्रेक्षक उत्सुक झाले आहेत.
या चित्रपटात केवळ मृण्मयी आणि राहुलच नव्हे, तर पुष्कराज चिरपुटकर, सुव्रत जोशी, सिद्धार्थ मेनन, हरीश दुधाडे आणि करण परब हे दमदार कलाकारही झळकणार आहेत. एकूणच कलाकारांचा तगडा संच पाहायला मिळणार आहे.
मृण्मयी देशपांडे, जी या चित्रपटाच्या लेखन आणि दिग्दर्शनाची जबाबदारी सांभाळते, ती म्हणते –
“‘मना’चे श्लोक’ ही कथा आहे मनवा आणि श्लोकची. त्यांचं नातं, त्यांची मतं, संवाद, सगळं खूप ओळखीचं वाटेल. लग्नासारख्या विषयावर सगळ्याचं काहीतरी वेगळं मत असतं. काही ठाम, काही गोंधळलेलं. हे सगळं काही आपण अनुभवलंय किंवा अनुभवणार आहोत. म्हणूनच हा चित्रपट पाहताना प्रेक्षक म्हणतील – ‘हे तर अगदी माझ्यासारखं आहे!’”
चित्रपटाचे निर्माते संजय दावरा यांच्यासाठीही हा सिनेमा खास आहे.
“मराठी सिनेमातला माझा पहिलाच प्रोजेक्ट. आणि तो ‘मना’चे श्लोक’सारख्या विचारप्रधान कथेसोबत सुरू होणं – ही खूपच वेगळी भावना आहे,” असं ते म्हणतात.
सह-निर्माते श्रेयश जाधव यांच्या मते,
“हा सिनेमा प्रेक्षकांच्या मनाला भिडणारा आहे. मृण्मयी ज्या प्रकारे कथा सादर करते, त्यात प्रेक्षक स्वतःला शोधतील.”
गणराज स्टुडिओ आणि संजय दावरा एक्सपरिअन्स निर्मित, नितीन वैद्य प्रॉडक्शन्स प्रस्तुत हा चित्रपट १ ऑगस्ट २०२५ रोजी प्रेक्षकांच्या भेटीला येणार आहे.
म्हणजेच, एक खास नातं, काही खास विचार, आणि त्यातलं तुमचं प्रतिबिंब… हे सगळं घेऊन ‘मना’चे श्लोक’ तुमच्या मनात घर करायला सज्ज आहे.